<p>　　按：吴雪香家娘姨小妹姐见外甥女阿巧要哭，骇异问道：“啥嗄？”阿巧哭道：一我勿去哉！”小妹姐不解，怔怔的看定阿巧；看了一会，问道：“阿是搭啥人相骂哉？”阿巧摇头道：“勿是。早晨揩只烟灯，跌碎仔玻璃罩，俚哚无(女每)说，要我赔个。我到洋货店里买仔一只末，嫌道勿好，再要去买，换一家洋货店，说要买好个。等到买得来，原勿好，要我去调，拿跌碎个玻璃罩一淘带得去，照样子买一只。洋货店里说要两角洋钱哚，调来也匆肯调。我做俚哚大姐，一块洋钱一月，正月里做下来勿满三块洋钱，早就寄到仔乡下去哉，陆里再有两角洋钱？”</p><p>　　小妹姐听说，倒笑起来，道：“故末阿有啥要紧嗄？耐个小干仵末也少有出见个！耐拿玻璃罩放来浪，明朝我搭耐去买。”阿巧忙道：“无(女每)；勿呀！俚哚个生活，我做勿转呀！早晨一起来末，三只烟灯，八只水烟筒，才要我来收捉。再有三间房间，扫地、揩台子、倒痰盂罐头，陆里一样勿做吓半日汰衣裳，几几花花衣裳，就交拨我一干仔，一日到夜总归无拨空。有辰光客人碰和，一夜天勿困；到天亮碰好仔，俚哚末去困哉，我末收捉房间。”小妹姐道：“俚哚再有两个大姐囗，来浪做啥？”阿巧道：“俚哚两家头阿肯做生活嗄！十二点钟喊俚哚起来吃中饭，就搭先生梳一个头；梳好仔头末，无事体哉，横来保榻床浪，搁起仔脚吃鸦片烟；有客人来，搭客人讲讲笑话，蛮写意。我末绞手巾、装水烟忙煞。大月底，看俚哚拆下脚洋钱，三四块、五六块，阿要开心！我是一个小铜钱也匆曾看见。”说到这里，又哇的哭出声来。</p><p>　　小妹姐正色道：“耐末总归自家做生活，（要勿）去学俚哚个样。俚哚来浪拆下脚洋钱，耐也（要勿）去眼热。故歇生来要吃点亏，耐要会梳仔个头末好哉。勿然我搭耐说仔罢，刚刚乡下上来，头一家做生意就匆高兴出来，出来仔耐想做啥？再有啥人家要耐？”阿巧呜咽道：“无(女每)，耐勿晓得呀！单是做生活倒罢哉，我来里做生活，俚哚再要搭我噪。我匆噪末，俚哚就匆快活，告诉无(女每)，说我做生活勿高兴。碰着会噪点个客人，俚哚同客人串通仔，拿我来寻开心：一个客人拉住仔个手，一个客人扳牢仔个脚，俚哚两家头来剥我裤子。”说着，复呜呜咽咽哭个不住。却引得葛仲英、吴雪香都好笑起来。小妹姐也笑了，急问：“阿曾剥嗄？”阿巧哭道：“啥勿曾剥！倒是先生看匆过，拉我起来。无(女每)晓得仔，例说我小干仵哭哭笑笑，讨人厌。”吴雪香按说道：“客人也忒啥无淘成！人家一个大姐，耐剥脱俚裤子，阿是勿作兴个！”葛仲英道：“一块洋钱一月，阿怕无拨人家要？（要勿）到俚哚去做哉！”小妹姐独无言。</p><p>　　迨房间内收拾已毕，葛仲英、吴雪香将要安置，小妹姐乃向阿巧道：“耐就匆做，也等我寻着仔人家末好出来，故歇耐转去，哝两日再说。”阿巧道：“价末无(女每)要搭我寻个囗！”小妹姐道：“晓得哉，耐去罢。”阿巧又问：“烟灯罩阿要赔嗄？”小妹姐叫把跌碎的留下：“明朝我去买。”又叮嘱：“难末做生活当心点！”</p><p>　　阿巧答应，辞了小妹姐，仍归至尚仁里卫霞仙家。那时客堂里宣卷道流正演说《洛阳桥》故事，许多闲人簇拥观听。阿巧概不理会，径去后面小房间见老鸨卫姐，回说：“烟灯罩洋货店里勿肯调，明朝无(女每)去买得来。”卫姐道：“耐到无(女每)搭去个？”阿巧说：“去个。”卫姐嗔道：“一点点事体，再要去告诉无(女每)！阿是告诉仔耐无(女每)末（要勿）赔哉？”</p><p>　　阿巧不敢顶嘴，踅上楼来，只见卫霞仙房里第二台吃酒客人尚未尽散。那客人乃北信典铺中翟掌柜暨几个朝奉，正是会噪的。阿巧自思生意将歇，何必再去巴结，遂不进房，竟去亭子间烟榻上暗中摸索睡下；听得前面一阵阵嘻笑之声不绝于耳，那里睡得着。随后拖台极凳，又夹着“忽刺刺”牙牌散落声音，知道是碰和了。阿巧正要起身，却听得那两个大姐出房喊外场起手巾，复下楼寻阿巧。卫姐说：“阿巧来里楼浪（口宛），常恐去因哉。”一个大姐道：“俚倒开心哚（口宛）！耐去喊囗。”一个大姐道：“我匆去喊，俚勿高兴做生活末，倪来做末哉。啥稀奇！”阿巧听了，赌气复睡，只因心灰意懒，遂不觉沉沉一觉。</p><p>　　直到日上三竿，阿巧醒来，坐在榻上，柔柔眼睛，侧耳听时，楼下寂然，宣卷已毕，惟卫霞仙房中碰和之后，外场搬点心进去，客人和两个大姐兀自噪做一团。阿巧依然回避，径往灶下揩一把面，先将空房间收拾起来。</p><p>　　须臾，小妹姐来了。阿巧且不收拾，留心窃听。听得小妹姐到小房间见了卫姐，把买的烟灯罩交付，问卫姐：“阿对？”卫姐呵呵笑道：“耐末去上小干仵个当，倒真真去买得来哉！我为仔俚做生活勿当心，说要俚赔末，让俚当心点，阿是真个教俚赔嗄？”说着，取两角小洋钱给还小妹姐。小妹姐坚却不收。卫姐只得道谢，随拉小妹姐并坐闲谈。卫姐又道：“该个小干仵生活倒无啥，就不过独幅点。来里堂子里，有个把客人要搭俚噪噪，也无啥要紧（口宛），俚乃噪仔要匆快活个。”</p><p>　　阿巧听到这里，越发生气，不欲再听，仍回空房间来收拾。等得小妹姐辞别卫姐出门，阿巧忙赶上去，叫声“无(女每)”，直跟至弄堂转弯处，方问：“无(女每)阿去搭我寻人家？”小妹姐道：“耐啥要紧得来！就有人家末，也要过仔该节哚，故歇陆里去寻？”阿巧复再三叮咛而归。</p><p>　　小妹姐去后，接连数日，不得消息。阿巧囡没工夫，亦不曾去吴雪香家探望。到了三月十四这一日，阿巧早起，正在客堂里揩擦水烟筒，忽见一肩轿子停在门首，一个娘姨打起轿帘，搀出一个半老佳人，举止大方，妆饰人古。阿巧揣度当是谁家奶奶。那奶奶满面怒气，挺直胸脯踅进大门，即高声问：“该搭阿是卫霞仙？”阿巧应说：“是个。”那奶奶并不再问，带领娘姨径上楼梯。阿巧诧异得紧，且向门首私问轿班，方知为姚季莼正室。阿巧急跑至小房间告诉卫姐。卫姐不解甚事，便和阿巧飞奔上楼，跟随姚奶奶都到卫霞仙房里来。</p><p>　　其时卫霞仙面窗端坐，梳洗未完。姚奶奶一见，即复高声问道：“耐阿是卫霞仙？”霞仙抬头看了，猛吃一惊，将姚奶奶上下打量一回，才冷冷的答道：“我末就是卫霞仙哉囗。耐是啥人嗄？”姚奶奶俨然向高椅坐下，嚷道：“勿搭耐说闲话！二少爷囗？喊俚出来！”霞仙早猜着几分来意，仍冷冷的答道：“耐问陆里一个二少爷嗄？二少爷是耐啥人嗄？”姚奶奶大吼，举手指定霞仙面上道：“耐（要勿）来浪假痴假呆！二少爷末是我家主公，耐拿二少爷来迷得好！耐阿认得我是啥人？”说着，恶狠狠瞪出眼睛，像要奋身直扑上去。霞仙见如此情形，倒不禁哑然失笑；尚未回言，阿巧胆小怕事，忙去取茶碗，撮茶叶，喊外场冲了开水，说：“姚奶奶请用茶。”再拿一支水烟筒，问：“姚奶奶阿用烟？我来装。”卫姐也按住姚奶奶，没口子分说道：“二少爷该搭勿大来个呀，故歇长远勿来哉。真真难得有转把叫个局，酒也匆曾吃歇。姚奶奶（要勿）去听别人个闲话。”</p><p>　　大家七张八嘴劝解之际，被卫霞仙一声喝住道：“（要勿）响！瞎说个多花啥！”于是霞仙正色向姚奶奶朗朗说道：“耐个家主公末，该应到耐府浪去寻（口宛）。耐啥辰光交代拨倪，故歇到该措来寻耐家主公？倪堂子里倒勿曾到耐府浪来请客人，耐倒先到倪堂子里来寻耐家主公，阿要笑话！倪开仔堂子做生意，走得进来，总是客人，阿管俚是啥人个家主公！耐个家主公末，阿是勿许倪做嗄？老实搭耐说仔罢：二少爷来里耐府浪，故末是耐家主公；到仔该搭来，就是倪个客人哉。耐有本事，耐拿家主公看牢仔，为啥放俚到堂子里来白相，来里该搭堂子里，耐再要想拉得去，耐去问声看，上海夷场浪阿有该号规矩？故歇（要勿）说二少爷勿曾来，就来仔，耐阿敢骂俚一声，打俚一记！耐欺瞒耐家主公。勿关倪事；要欺瞒仔倪个客人，耐当心点！二少爷末怕耐，倪是匆认得耐个奶奶（口宛）！”一席话说得姚奶奶顿口无言，回答不出，登时涨得彻耳通红，几乎迸出急泪来。正待想一句来扳驳，只见霞仙复道：“耐是奶奶呀，阿是奶奶做得勿耐烦仔了，也到倪该搭堂子里来寻寻开心？可惜故歇无啥人来打茶会！倘然有个把客人来里，我教客人捉牢仔耐强xx一泡，耐转去阿有面孔！耐就告到新衙门里，堂子里奸情事体也无啥希奇（口宛）！”</p><p>　　不料这里说得闹热，楼下外场蓦喊一声“客人上来”。霞仙便道：“来得正好，清房里来。”卫姐掀起帘子，迎进一个四十余岁的客人，三绺髭须，身材肥胖，原来即系北信典铺翟掌柜。早吓得姚奶奶心头小鹿儿横冲直撞，坐也不是，走也不是，又羞又恼，那里还说得出半“个”字。</p><p>　　翟掌柜进房，且不入座，也将姚奶奶上下打量一回，终猜不出是什么人。霞仙笑问翟掌柜道：“耐阿认得俚？俚末是姚季莼姚二少爷个家主婆，今朝到倪该搭堂子里来，有心要坍坍二少爷个台。”翟掌柜听罢茫然，卫姐过去附耳说些大概，方始明白。翟掌柜攒眉道：“故是姚奶奶失斟酌哉！倪搭季莼见也同过几转台面，总算是朋友。姚奶奶到该搭来，季莼见面浪好像勿好看相。”霞仙道：“啥勿好看相？出色得野哚！二少爷一径生意勿好，该着仔实概一个家主婆，难末要发财哉！”</p><p>　　翟掌柜摇手止住，转劝姚奶奶道：“姚奶奶故歇请回府，有啥闲话末，教季莼兄来说好哉。”姚奶奶无可如何，一口气奔上喉咙，“哇”的一声要哭，慌忙立起身来，带领娘姨出房下楼。霞仙还冷笑道：“姚奶奶再坐歇囗。倘忙二少爷来仔末，我教娘姨来请耐！”</p><p>　　姚奶奶踅至楼下，忍不住呜呜咽咽，大放悲声，似乎连说带骂，却听不清楚，仍就门首上轿而回。</p><p>　　姚奶奶既去，霞仙新妆亦罢，越想越觉好笑，道：“蛮体面个二少爷，难看俚阿好出来做人！一个奶奶跑到堂子里拉客人，赛过是野鸡哉（口宛）！”卫姐也叹口口气道：“做仔个奶奶，再有啥勿开心咱家走上门来，讨倪骂两声，阿要倒运！”霞仙道：“耐末也（要勿）说哉！勿曾拨俚丁倒骂两声，总算耐运气！”卫姐微笑自去。</p><p>　　翟掌柜问：“为啥要了倒拨俚骂两声？”霞他笑而告诉道：“愧无(女每)末真真是好人。二少爷就日日到倪搭来，倪也无啥说匆出（口宛）；倪无(女每)定归要说是二少爷长远匆来哉，倒好像是倪怕俚。再有个阿巧，加二讨气！前日仔宣卷，楼浪下头几花客人来浪，喊俚冲茶，勿晓得到仔陆里去哉，客人个茶碗也匆曾加；今朝二少爷家主婆来仔，耐勿曾看见俚巴结得来！倪勿曾喊俚，俚倒先去泡仔一碗茶，再要搭俚装水烟，姚奶奶长，姚奶奶短。自家生活豁脱仔勿做，单去巴结个姚奶奶。陆里晓得姚奶奶觉也匆曾觉着，拍马屁拍到仔马脚浪去哉！”</p><p>　　阿巧适舀一盆面水上来给霞仙洗手，听说，即回嘴道：“姚奶奶末也是客人，为啥勿该应泡茶拨俚吃？”霞仙笑向翟掌柜道：“耐听听俚闲话，阿要气煞人！姚奶奶说是客人，阿是倪做个嗄？”阿巧道：“做勿做勿关我事，耐哚同姚奶奶来里相骂，例说我拍马屁！”霞仙沉下脸道：“耐个人啥粳得来！耐该搭勿高兴做，去末哉（口宛），姚奶奶喜欢耐拍马屁！”</p><p>　　阿巧撅起嘴踅下楼来，草草收拾完毕，吃过中饭，捱至日色平西，捉个空复往东合兴里吴雪香家，寻见小妹姐，诉说适间情事，哭道：“生活勿做，生来要说；做仔生活，再要说！随便啥事体，总是我匆好！无(女每)说哝两日，哝勿落哉（口宛）！”小妹姐道：“哝勿落末，出来到啥场花去？”阿巧道：“随便啥场花，就无拨工钱也无啥！”小妹姐沉吟不语。吴雪香道：“价末到该搭来帮帮耐无(女每)，再去寻人家，阿好？”阿巧说：“蛮好。”小妹姐也就依了。当晚，小妹姐便向卫霞仙家算清工钱，取出铺盖。</p><p>　　阿巧在吴雪香家仅宿一宵，次日饭后，吴雪香取出一对翡翠双莲蓬，令阿巧资至对门大脚姚家交还张蕙贞，并说：“绿头蛮好，比我一对倒差仿勿多，十六块洋钱，一点勿贵。”阿巧见张蕙贞传说明白，张蕙贞因问阿巧：“阿是新来个？”阿巧据实说了。蕙贞道：“倪故歇再要添个大姐，先生勿用末，该搭来罢。”阿巧不胜之喜，道：“故是再好也匆有！”连忙归来说与小妹姐，即日小妹姐亲自送去。阿巧囡住在张蕙贞家。</p><p>　　适遇王莲生偕洪善卿两个在张蕙贞家便夜饭，蕙贞将翡翠双莲蓬与王莲生看，问：“十六块洋钱阿贵？”洪善卿只估十块。莲生道：“还俚十块，多到十二块（要勿）添哉。”蕙贞又诉说添用大姐一节。莲生见阿巧好生面善，问起来，方知在卫霞仙家见过数次。</p><p>　　迨夜饭吃毕，张蕙贞已烧成七八枚烟炮放在烟盘里。王莲生揩把手巾，向榻床躺下。蕙贞授过烟枪，“飕飕”的直吸到底。蕙贞接枪，通过斗门，再取烟泡来装。</p><p>　　莲生向蕙贞道：“耐要买翡翠物事，教洪老爷到城隍庙茶会浪去买，便宜点。”蕙贞因要买一副翡翠头面，拜托洪善卿。善卿应诺，辞别先行，自回南市永昌参店去了。</p>